Nodonlik

Nodonlik
	;
Qardosh loyihalar
	Vikipediyadagi maqola Vikimaʼlumotlar sahifasi Vikilugʻatdagi maʼnolari Vikiombordagi tasvirlar

Nodonlik — 1) bilimsizlik, ongi pastlik; johillik; 2) nodon kishilarga xos xatgi-harakat, ish; ahmoqlik.

A

	Agar oqil odam nodonlar gurungiga tushib qolsa, ulardan izzat-ikrom kutmasin, agar nodon bemaʼni kalomi bilan oqilni yengsa, buning hech ajablanadigan joyi yoʻq, zero yoqutni tosh ham sindirishi mumkin^[1].
	— Saʼdiy Sheroziy

	Aqlli boʻlsang, johil va nodondan hazar qil. Aqalli biroz bilimi bor kishi ulardan albatta yuz chaqirim uzoqlashadi^[2].
	— Majididdin Xavofiy

	Aqlli kishi qadr-u kamol, nodon kishi esa davlat-u mol qidiradi.
	— Otalar soʻzi^[3]

	Aql odamni yashnatadi, nodonlik esa qaqshatadi.
	— Otalar soʻzi^[4]

	Bizning baxtsizligimiz – nodonligimizda, xolos. Millat uygʻonsin, koʻzini ochsin, oʻqisin, bilim olsin, madaniy millatlar qatoriga kirsin, soʻngra u ham oʻz davlati, oʻz baxti, oʻz saodatini quradi^[5].
	— Abdulhamid Choʻlpon

	Donishmand — baqqolning doʻkoniga oʻxshaydi: borini indamaygina koʻrsatadi-qoʻyadi, nodon esa lashkar nogʻorasining oʻzi: ovozi baland-u ichi boʻm-boʻsh va gʻarib^[6].
	— Saʼdiy Sheroziy

	Dono bilan zindon ichida xurram, Nodon bilan hatto boʻston jahannam!^[7]
	— Abulbarakot Qodiriy

	Donoga yondoshgil, qoch nodondan san, Hatto u xavflidir dono dushmandan^[8].
	— Jaloliddin Rumiy

	Donolar soʻziga quloq ilmasang, Eng nodon sendirsan – bilgil, bilmasang^[9].
	— Abulqosim Firdavsiy

	Dono suhbatidan bosh tortsa nodon, Davrondan yaxshilik koʻrmas hech qachon^[10].
	— Abdurahmon Jomiy

	Eng ogʻir dard nodonlik.
	— Otalar soʻzi^[11]

	Johillikdan besaodatroq nima bor?^[12]
	— Alisher Navoiy

	Nodonga nasihat qilsang, bir qulogʻidan kirib, ikkinchi qulogʻidan chiqib ketadi.
	— Otalar soʻzi^[13]

	Nodonlik boyoʻgʻlidir, boyoʻgʻli esa doim xarobani izlaydi.
	— Otalar soʻzi^[14]

	Nodonlikdan yomonlik keladi faqat, Nodonga yondoshma, bosmasin gʻaflat^[6].
	— Abulqosim Firdavsiy

	Nodonlik ovining oʻljasi hasrat, Nodonlik bahorin yomgʻiri kulfat^[2].
	— Bedil

	Nodonning foydasiga gapirsang, jahli chiqadi.
	— Otalar soʻzi^[13]

	Nodonning idroki – indamaslikda. Agar nodon buni tushunib yetsa, uning yarim dono boʻlgani shudir^[10].
	— Saʼdiy Sheroziy

	Nodonning vaqti foydasiz oʻtadi.
	— Otalar soʻzi^[14]

	Nodon odamning gapi koʻp boʻladi.
	— Otalar soʻzi^[15]

	Nodon odamdan aloqani uzish — aqlli odam bilan aloqa qilishga barobar.
	— Otalar soʻzi^[7]

	Nodon suhbatidan aylasang hazar, Vujudingga aslo yetmagay zarar!
	— Otalar soʻzi^[7]

	Ogʻir balodir kim boʻlsa nodon, Nodon uchun yoʻqdir dori-yu darmon!
	— Otalar soʻzi^[11]

	Qanchadan-qancha odamlar aql bilan pastlikdan yuqoriga koʻtariladi, qanchadan-qancha qadrli odamlar nodonlikka yoʻl qoʻyib, pastlik sari qulaydi.
	— Otalar soʻzi^[16]

	Qul-u ozodga maʼlum va ayon, Dono tirikdir, oʻlikdir nodon^[10].
	— Abdurahmon Jomiy

	Yoinki bir asr zindonda yotmoq, Nodon suhbatidan koʻra yaxshiroq^[14]^[10].
	— Pahlavon Mahmud

	Oʻzini bilimdon deydigan nodondan qoch^[10].
	— Qobus

Xomidiy, Hamidjon; Hasaniy, Mahmud. Mashriqzamin hikmat boʻstoni. Toshkent: „Sharq“ nashriyotmatbaa konserni, 1997 — 251-bet. ISBN 978-9943-00-130-5.
Tursun, Ahmad. Sharq donishmandlari hikmatlari. Toshkent: „Sharq“ nashriyot-matbaa aksiyadorlik kompaniyasi, 2006 — 208-bet.